Mandok Hata Tu keluarga Na Marhabot Ni Roha

Oleh: Ike Lumbantoruan

            Jumolo mandok mauliate ma hita tu Amanta pardenggan basa siala asi dohot holong ni rohaNa boi hita marhahipason di apala ombason. dison pe Inang na ro do hami sian parhalado ni hurianta ima napasahanton hata pangapulon tu ina nami nang tu sude keluarga na adong di inganan on. Ima di naung jumolo marujung ngoluni ama na tahaholongi on.

Sitaonon na borat jala ngotngot dijolma na mangolu ima sinirang ni 'hamatean'. Lumobi molo na monding i hinaholongan ni rohanta.

Alai ingot hamu ma inang dang pasombu ni Debata sai tumatangis hamu, molo pe ngolunta di portibion madabu jongjong alai gumodang do hita jongjong ala Asini roha  sian Tuhan i.

Sude do hita jolma ingkon mate molo jumpang tingkina. Sada pe sian hita ndang adong na boi pasidinghon i. Alai pangidoanta, molo tung marujung pe nian ngolunta sian hasiangan on, asa jolo sahat ma nian hita tu na saur-matua. Ima songon pangidoan dohot elek-elekta tu Tuhanta. Alai molo tung masa pe na masa i, asa dapot ma di hita songon hata ni endenta, “Sai rade ale tondingku, tagam panjouonna i manang hata ni ende di Buku Ende nomor 539:4 ( Disi ma marsomba, marende sude tu Tuhan Jahowa singomgom sude, tu Tuhan Jahowa sigomgom sude ).

Jala songon nidok ni umpasa : Ramba nisipoholon marduhut-duhut sitata. Las ni roha dohot sitaonon sude do sian Amanta Debata. Asa hau ni Gunungtua dangkana mardagul-dagul, Tibuma dilehon Tuhannta dihamu Tua jala tibu hamu di apul-apul.

Asa holan dibagasan Jesus do jumpang lasniroha na manontong,  jala Ibana do pasohon ilu-ilu sian mata ni angka na tumatangis, jala na mangalean apul-apul ala parsorion pinarsorihonNa, pangoluhon na mate. Antong tapuji ma Debata dingolunta, margogo ma hita jala marpanindangion.

unang be sai lalap diparlalapan, Sai tontong marhaporusan tu Tuhan ni ma hita, ala dang adong naso tarpatupa ni Debata.

Jadi di hamu inang dohot sude sisolhot na tininggalhon ni damang na tahaholongi on, pabulus ma roha muna dipanadingkon ni ama na tahaholongi on.  Jala nagabe hata ni Debata sitiopan muna ima natarsurat di Pilippi 1:21 namandok       “Ai Kristus do hangoluan di au, jala laba do nang hamatean” botima hata apul-apul sian hami sai anggiat ma tibu tarapul rohamuna. Mauliate.